الشيخة اللي نسات هزة الكتف

 

آيه أسيدي، هيا أنا، هزيت بكتفي الزمان تا عيا من مني و تلاح من فوقي، واحد و ربعين عام و أنا كنعيط على السالبني تا سلبات مني حمامة الدنيا عمامة الرزق و خلات راسي راسو يلاگي حر الشمش و يسگي من بحر العمى بعدما جف بير العمش..

حليت عيني فالصباح و شفت بلي ضو الشمش غاب من روحي..

تما نسيت الرباح و بركت على سفينة الدمع كنساين ف نوحي.. 

دوزت ليام الملاح، كنعلم فلي جا و فلي جال و فليل كنسا لوحي..

غواتني الدنيا بلا تفاح، بركاتني، غدرات نفسي و قالت ليها بوحي..

فهمات منها بارود الفرح منين كايخرج و بدلات لي المكحلة بما كحل منها، فاش جيت نقصد الهم لقيت الدم خارج من جلابتي..

ما يغرك لي يشكي قدام بابك لا تقطع حبلو، خليه يجرب ما عشت أنا و يشوف حبال صوتي فشلو، صوتي يا لي غنيت بيك و غنيت ليوم نتا لول تخوي بيا و تا باش نبكي عليك ما لقيت.. واش يدير مول البندير لا من بعد الغرامة و الخير تصبح يدو مشلولة و صباعو تحير.. واش يدير الفلاح لي من بعد الخضرة و الديسير تصبح رجلو مقتولة و فاسو يولي ضرير.. كي الرقاصة لي فرضو عليها الدار الخمار من بعدما ولفات ريالات القمّار.. كي الگزار لي باع فالغنم و البقار تا غلط في المنشار لي خلاه ما يدخل لا لحم لا شحمة للدار.. 

هادو ناس جغموا من نفس گلة الهموم.. و عرفوا أن الدنيا عقرب ما تموت واخا تخلي في فخضك السموم.. فهموا بلي ما تيق فعقارب الساعة لا دارو و ما لقيتي ساعتها لي تلوم.. عمرك تيق بلي غادا تصب الشتا واخا تقيس بيدك فزوگية الغيوم.. صوتي كنت بيه تنواسي كل من تيقاسي و ليوم بغيت غا نسمعني مرة وحدة و لو تكون فحلمة من نعاسي.. يا دنيا قولي ليا واش كان مكتاب ليا ننسا هزة الكتف و صوتي يتخطف و لا دارها ليا راسي.. يا ..mmmmm غا سمعيني بلا صوتي را خوتي سكرات من حر الدقة و نتي بدموعهم كتطاسي.. يا دنيا راه تكشيطتي مشات لجنازة الحق بعدما ظنيتو عرّاسي.. يا دنيا راه القاصرة جاو فيها الخطاب و الشارف تايسول فالشيطان واش بنت العربي قياسي؟ يا دنيا راه ولد العربي خارج يتقاتل.. باش يلقا راسو تا يشفر..باش ينسا راسو و يسكر، و هو فراسو بلي مينة كتقول عليه نقرة لي تْغَبّر لدينمي نحاسي.. يا دنيا تغبر حظي و ذبحني موس العمر واخا جنسي ما فيه سداسي.. يا دنيا شفرتي ليا صوتي لي كان عاصي غا قولي واش رشيتي عساسي.. يا دنيا فرقتيني على أرض الرباح كيفاش نستقل و شكون يكون لي علال الفاسي.. 

آييه، أنا الشيخة الزيزونة لي نسات هزة الكتف، أنا الشيخة لي تلفات على شدة الدف، أنا الشيخة لي ما بقات قادرة لا تزيد تفسد و لا ترجع تعف.. أنا الشيخة لي غي البارح جدك كان شاد عليا الصف.. أنا الشيخة لي غلباتها الدنيا و مااااا بغات تعف.

يونس لمنور